Rusiye uquq qoruyıcıları Aqyardan ve Qırımnıñ Or Qapı rayonından eki er adamını tutıp, "devlet hainliginde" qabaatladı. Rusiye Federatsiyasınıñ FSBsi haber etkenine köre, olar Qırım yarımadasında olğan arbiy obyektlernen bağlı malümatnı Ukrayinağa bergen eken, dep yaza Rusiye kütleviy haber vastaları müessiseniñ matbuat hızmetine esaslanıp.
Berilgen malümatqa köre, tutulğan erkekler "çetel reberlerinen özleri bağlanıp", Rusiye arbiyleri, ava mudafaasınıñ yeri aqqında malümat bergen, Ukrayina darbeleriniñ aqibetlerini qayd etken, Rusiye Federatsiyası Mudafaa nazirligi bölükleriniñ yerleri aqqında bildirgen eken.
Tutulğan insanlarnıñ ad ve soyadları aytılmay. Rusiyege qoltutqan bloger Aleksandr Talipov açqan "Krımskiy SMERŞ" Rusiye Telegram kanalı yazğanına köre, laf 1991 ve 1996 seneleri doğğan erkekler aqqında kete. Rusiye FSBsi derc etken videoda beti qapatılğan bir adam bar, kamera qarşısında Rusiye uquq qoruyıcıları seslendirgen versiyanı tasdıqlay. Seslendirilgen malümatnıñ doğrulığını cenk vaziyetinde teşkermek imkânsız ola, bu şaatlıqlarnıñ qaydı basqı altında yapılğandır.
Olarnıñ qabaatı mahkemede isbatlansa, ömür boyu apis cezasını ala bileler. Ukrayina tarafı bu haberni izaatlamadı.
Rusiyede ve işğal etken topraqlarında uquq qoruyıcılar Ukrayina tarafdarlarını taqip ete. Rusiye tarafdarı olğan qırımlı bloger Aleksandr Talipov öz Telegram kanalında Ukrayinağa qoltutqan Qırımlılarnıñ şahsiy malümatını derc ete. Böyle şikâyetler neticesinde qırımlılar RF ordusını "itibardan tüşürgenleri" içün tutula ve memuriy ve cinaiy mesüliyetke çekile.
Aq qorçalayıcılar Rusiye uquq qoruyıcıları Qırımda devlet hainligi, Ukrayina ile işbirligi, casuslıq ve diversiya maddelerine istinaden açqan davalarınıñ sayısı artacaq, dep tahmin ete. 2014 senesinden evel böyle davalarnıñ sayısı yılda eñ çoq 10 olsa, şimdi FSB böyle davalarnı aman-aman er kün aça.