Rusiye işğal etken Qırımnıñ yolbaşçısı Sergey Aksenov ve Aqyarnıñ Rusiye reberi Mihail Razvojayev regional seviyede fevqulâde vaziyet rejimi kirsetilgenine dair buyruqlarını imzaladılar.
Rusiye akimiyeti qayd etkenine köre, qarar birinciden iqtisadiy meselelerni tertipke ketirmek içün alındı.
Onıñ malümatına köre, fevqulâde vaziyet rejimi ealini temin etken bütün saalarnıñ stabil işini teşkil etüv vazifelerini tez al etmege imkân bere.
Aksenov qayd etken vesiqağa köre, regional seviyede daa 2022 senesi fevralniñ 24-nde № 32-U buyruğınen tanılğan fevqulâde vaziyet telükesi bugünden başlap regional seviyede tehnogeyen fevqulâde vaziyetke çevirildi. Rejim başqa bir ferman olğanına qadar 2026 senesi iyünniñ 26-ndan itibaren devam etecek.
Vaziyetni al etüv tedbirleri 2022 senesi fevral ayında qabul etilgen № 32-U buyruğınen belgilengen tedbirlerge köre yapılacaq. Qırımda idare organları ve Fevqulâde vaziyetlerni yoq etüv ve tenbi sisteması 2024 senesi dekabrniñ 28-nde № 433-U buyruğınen cermay tökülgeni içün kirsetilgen "fevqulâde vaziyet" rejiminde çalışmağa devam eteler.
Regional seviyede tehnogen fevqulâde vaziyetni yoq etüv reberi olaraq Qırımnıñ Rusiye Nazirler şurası reisi Yuriy Gotsanük tayin etildi. Belediye qurulışlarında Rusiye memuriyetleriniñ yolbaşçıları oldı. Aksenov buyruqnıñ yerine ketirilüvini özü kontrol etecek.
Hatırlatamız, Qırımda Ukrayina Silâlı quvetleriniñ ücümlerinden soñ energetik kollaps qayd etile. Elektrik ve suv da ara-sıra kete. Keriç (Qırım) köprü ögünde maşina nevbetleri qayd etile.