Qırım saifeleri Rusiye işğal etken Qırım ve Aqyarda elektrik problemleri aqqında bildire.
"Krımskiy veter" Telegram kanalı abunecileriniñ malümatına esaslanıp, "Aqyarda elektrik farqlı rayonlarda 5 daqqadan 12 daqqağa qadar yoq edi".
Qırım saifeleri Canköy rayonı, Saq, Ermeni Bazar, İslâm Terek ve Qurman rayonları ve Kefede elektrik yoq, dep bildire.
"ÇP/Krım" Telegram kanalı yazğanına köre, "bütün yarımadada elektriklerniñ söndürilgeni haber etile".
Qırım regionlarında elektrik söndürilüvi uçucısız darbelerine dair haberler vaqtında oldı. Rusiye kontrolindeki Aqyar akimiyeti ava telükesiniñ başlanğanı ve lâğu etilgeni aqqında ilân etti. Monitoring kanalları "Qırımnıñ energetika infrastrukturasına qarşı" ücüm aqqında yazdı.
"Uçucısız ücümi saat 17.30-larda başladı, dronlarnıñ ekinci dalğası saat 20.45-lerde keldi ve uçmağa devam etkenine oşay. Çoq patlav oldı, esasen şimaliy Qırımda ve Aqmescit rayonında Tavrik issilik elektrik stantsiyasında", – dep yaza "Krımskiy veter" Telegram kanalı.
Aynı vaqıtta "Krımenergo" "Qırımnıñ doquz rayonı magistral hatlarda tehnik bozuvlar sebebinden ışıqsız qaldı", dep haber etti.
Rusiyeniñ Ukrayinağa qarşı büyük istilâsı vaqtında bu malümatnıñ doğrulığını teşkermek imkânsız ola.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.