Qırım ve Aqyarda bir künde qayd etilgen COVID-19 hastalarınıñ sayısı artmağa devam ete. Bu aqta Qırım ve Aqyarnıñ Rusiye ükümetleriniñ saytları haber ete.
Bir künde Qırımda 262 koronavirus hastası qayd etildi. Bu tünevinki raqamlardan daa yüksek oldı.
Bir künde 259 insan yahşı oldı, 10 hasta vefat etti.
Aqyarda 183 yañı COVID-19 hastası qayd etildi. Bundan evel akimiyet 148 hasta aqqında bildirdi.
Soñki künde 28 insan tüzelip yiberildi. 77 ve 88 yaşında eki insan vefat etti.
Yanvarniñ 17-nde Rospotrebnadzor Aqyarda ilk sefer «omikron» ştammı qayd etildi, dep bildirdi. Aqyarnıñ Rusiye yolbaşçısı Mihail Razvojayevniñ Instagramda bildirgenine köre, «omikron» ştammı sebebinden COVID-19 hastalarınıñ sayısı «bayağı yüksek» olacaq.
Qırımnıñ Rusiye yolbaşçısı Sergey Aksenov, Qırımda «omikron» ştammı qayd etildi, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
