Bugün Serbest Avropa Radiosınıñ Ukrayına hızmeti/Azatlıq Radiosınıñ Qırım.Aqiqat leyhası 10 yaşını toldura.
Azatlıq Radiosınıñ Qırım leyhası 2014 senesi mart ayında quruldı – Rusiyeniñ Qırım işğaliniñ ve ilhaqınıñ ilk aftalarında.
Leyha saytınıñ 10 yılı devamında Qırım.Aqiqatnıñ rusça, ukrayınce ve qırımtatar tillerinde çıqqan haberlerni 230 million oquyıcı ziyaret etti. Qırım.Aqiqatnıñ YouTube kanalınıñ tahminen 440 biñ abunecisi bar. Bu vaqıt devamında derc etilgen videolar 247 mln kere ve aman-aman 14 mln saat baqıldı. Qırım.Aqiqat Radiosınıñ yayınları da YouTube kanalında yayınlana. Bundan ğayrı, Qırım.Aqiqatnıñ radio yayınları Ukrayına radiosınıñ yayınında çıqa.
Qırım.Aqiqat bir çoq içtimaiy ağda ve messencerde bar. Qırımda populâr olğan Telegram leyha işinde çoq qullanıla, tek soñki yılda Qırım.Aqiqatnıñ Telegram kanalını 77 milliondan çoq insan oqudı.
Azatlıq Radiosınıñ Qırım taqımı er afta «Qırım.Aqiqat» televizion programmasını da azırlay – Ukrayınanıñ umummilliy ve regional telekanalları içün ukrayınce ve «Nastoyaşçeye Vremâ» halqara uydu telekanalı içün rusça.
Rusiye akimiyeti Qırım.Aqiqat saytınıñ işini bir qaç kere blok etmege ve Qırım.Aqiqat Radiosınıñ signalını bastırmağa tırıştı, Qırım.Aqiqat jurnalistleriniñ işine mania yapıldı. 2022 senesi fevral ayında Rusiyeniñ Ukrayınağa qarşı büyük istilâsı başlağanından Rusiye işğal etilgen Ukrayına regionlarında, Rusiyede Qırım.Aqiqat saytlarını blok etti, Qırım.Aqiqat Radiosınıñ programmasını aman-aman bütün Qırım yarımadasına retranslâtsiya etken radio yayınlatıcısını zapt etti.
10 yıl içinde Qırım.Aqiqatnıñ 70 jurnalisti Rusiye mahsus hızmetleriniñ basqısı ya da taqibine oğradı, ekseriyeti Rusiye işğal etken yarımadanı terk etmege mecbur edi. Qırım.Aqiqat közeticisi Mıkola Semena Rusiye kontrolindeki Qırım mahkemesi tarafından 3 yıl cemaat (hususan jurnalist) faaliyetinen oğraşmaq yasağınen 2,5 yılğa şartlı olaraq üküm etildi. 2021 senesi fevral ayında Rusiye mahsus hızmetleri Qırım.Aqiqatnıñ serbest hadimi Vladislav Yesipenkonı silâ saqlağanında qabaatlap, 6 yılğa üküm etti.
Qırım.Aqiqatqa malümat bergen ondan ziyade bloger ve vatandaş jurnalisti Rusiye akimiyeti tarafından apiske alındı ve terrorizm ve ekstremizm qabaatlandı.
2016 senesi Qırım.Aqiqatnıñ Aqmescit, Aqyar ve Yaltada yaşağan 6 jurnalistiniñ evinde Rusiye FSBsi tintüv keçirip, tehnikalarını aldı. Bir qaç Qırım.Aqiqat junalistiniñ Qırımğa kirişi uzun vaqıtqa yasaqlandı.
Qırım.Aqiqatnıñ 10 yılını qayd etüv çerçivesinde Kyivde martnıñ 26-nda «Qırım işğaliniñ ve tirenüviniñ 10 yılı Qırım.Aqiqat jurnalistleriniñ fotoresimlerinde» sergisi açılacaq ve «Qırım: kelecekke bir baqış 2.0» açıq munaqaşası ötkerilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
