Qırım aliy oquv yurtlarınıñ mezunlarını diplom almazdan evel arbiy komissarlıqqa celpname almaları içün (alğanına dair imza qoymaq şartınen) oquv yurtlarınıñ reberligine çağıralar. Bu aqta Qırım.Aqiqatqa «Serbest Qırım» cemaat teşkilâtınıñ tesisçisi Aleksey Yefremov bildirdi.
Cemaatçınıñ malümatına köre, bu teşebbüs arbiy komissarlıqlardan kele.
«Qırım aliy oquv yurtları Rusiye arbiy komissarlıqlarınıñ isteklerini yerine ketire. Kerçekten çağıra, kerçekten arbiy komissarlıqlarğa yollay ve anda, pek sıq yapqanları kibi, Rusiye Mudafaa nazirliginen añlaşma imzalamağa zorlaylar, uruş areketleriniñ iştirakçilerine olaraq çoq şey vade eteler. Amma, elimizdeki malümatqa köre, askerlikke alınacaq bütün mezunlar çağırılmay, çünki bütün arbiy komissarlıqlar bunı daa qullanmay», – dedi faal.
Yefremovnıñ qayd etkenine köre, Kreml kontrolindeki Sudaq arbiy komissarlığına aliy oquv yurtunda celpname alıp kelgenlerni tibbiy komissiyağa yollaylar, amma orduğa tek küzde almağa vade eteler.
«Qırım aq qorçalayıcı gruppasınıñ» yolbaşçısı Olga Skripnik Rusiye Qırım işğali vaqtında ordusına eñ az 40 biñ yarımada sakinini çağırdı, dep bildirdi.
«Krım SOS» aq qorçalayıcı teşkilâtınıñ idare yolbaşçısı Aleksey Tilnenko qayd etkenine köre, 2022 senesiniñ soñuna qadar Qırımnıñ Rusiye mahkemeleri askerlik yapmaqtan vahgeçüv aqqında tahminen 130 dava açtı.
Ukrayına prezidentiniñ Qırımdaki daimiy temsilcisi Tamila Taşevanıñ aytqanına köre, 2015 senesinden başlap Rusiye akimiyeti tahminen 39 biñ Qırım sakinini Rusiye ordusına çağırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
