Rusiye iş adamları Qırımdaki faaliyetini toqtata, rusiyeli mülk saipleri is ev ve dairelerini ucuz sata. Sebep – Qırımnıñ Rusiye kontroli altında qalacağına inanmamaları. Bu aqta Qırımtatar Milliy Meclisiniñ reis muavini, Ukrayına halq deputatı Ahtem Çiygoz «Svoboda LIVE» (Azatlıq Radiosı) yayınında ayttı.
«Qırım bu gavande (Rusiyede – QA) qalacağına inanmaylar. Fiyatlar tüşti. Eñ müimi Rusiye yatırımcıları yoq, şirket ve qurucılıqlarını taşlaylar. Dairelerni kimse almay», – dedi Çiygoz.
Onıñ aytqanına köre, Rusiye vatandaşlarınıñ inanmağanı Qırımdaki patlavlardan soñ körünip başlandı.
«Bu esnaslar (işanmama ve telâş – QA) devam ete, bıltır sentâbr ayında başladı, amma Qırımğa bergen soñki «ediyelerimiz»… semetdeşlerim böyle «bahşışlarnı» daa sıq yollamaq kerek, dep aytalar, bu esnaslarnıñ tezleşmesine tesir ete (…) Bular demoralizatsiya esnasını başlata. Qırımda mayıs şaşlıqları kesek-kes olmaycaq. Qırım olar içün pek sıcaq edi: sıcaq, küneş, deñiz. Bular endi yoq. Eñ esası Qırımda raatlanmaq niyetlerini bozdıq. Rusiyeliler telükeli yerlerge barmağa sevmek. Şunıñ içün şaşlıq olmaycaq», – dep ayttı Ahtem Çiygoz.
Martnıñ 24-nde Rusiye Telükesizlik şurasınıñ reis muavini Dmitriy Medvedev Ukrayına Silâlı quvetleriniñ Qırımğa ücüm etmesi Rusiyeniñ özek silâsını qullanması içün sebep olacaq, dep bildirdi.
Bundan soñ Ukrayına Mudafaa nazirliginiñ Baş istihbarat idaresi Qırım işğalden azat etilip, anda «qanuniy Ukrayına akimiyeti qaytarılmalı», dep qayd etti.
Fevralniñ 24-nde Ukrayına prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirdi.
Ukrayına prezidenti ofisiniñ yolbaşçı muavini İğor Jovkva Qırım.Aqiqatqa intervyü berip, Ukrayınanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep ayttı. Onıñ qayd etkenine köre, kimse Qırım Kyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayınanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirdi.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
