Rusiye işğal etken Qırımğa Mekkege acılıqqa barğan qırımlı musulmanlar qaytıp başladı. Qırım eyyetiniñ tahminen yarısı qomşu Rusiyede yaşağan musulmanlardan ibaret olğan eken. Bu aqta Qırım.Aqiqatqa acılıqqa barğanlardan biri adını gizli qaldırmaq şartınen bildirdi.
Bu yıl Qırım kvotasınen 500 musulman acılıqqa bardı. Olarğa Rusiye kontrolindeki Qırım ve Aqyar musulmanları diniy idaresi (QAMDİ) yanındaki acılıq operatorı hızmet etti. Er bir gruppağa acılarğa din ve til meselelerinde yardım etken, yanlarında olğan reber berildi. Acılarnıñ yanında ekimler de bar edi.
İştirakçiniñ malümatına köre, QAMDİ Saudiy Arabistan Qırımğa bergen 500 kişilik "regional" kvotanı toldurıp olamadı.
"Qırımğa bu yıl acılıqqa baracaq 500 kişilik kvota berildi, amma müftilik kerekli sayıda istekli tapamadı, şunıñ içün kvotanıñ yarısını qomşu Rusiyeniñ regionlarında yaşağan musulmanlarnen tamamladılar. Rusiyeniñ Qırım işğalinden evel acılıqqa barmağa istegenlerniñ sayısı Qırım içün berilgen kvotadan daa ziyade edi, bu yıl müftilik de tam çalışmadı, ve Qırım ve Yaqın Şarqtaki telükeli vaziyet sebebinden istegenler çoq yoq edi", – dedi faal.
2025 senesi qırımlı acılar kvotası 500 kişilik edi. 2024 senesi, QAMDİ malümatına köre, 300 qırımlı Mekkege acılıqta iştirak etti. Resmiy operator OOO "AVN TUR" ola. 2027 senesi Qırımdan acılıqqa barmaq 4,5 biñ dollar olacaq.
Qayd etmek kerek ki, Rusiye kontrolindeki QAMDİ saytında "Acılıq" bölümi 2020 senesinden berli yañartılmay.