Qırımdaki Rusiye İç işler nazirligi yarımadanıñ şeer ve qasabalarında beraber patrul yapmaq ve «narkotiklerge qarşı tedbirler, gençler ile terbiye işini keçirmek içün» qazaqlarnı celp etecek. Bu aqta noyabrniñ 25-nde Qırımdaki Rusiye politsiyasınıñ matbuat hızmeti bildire.
«Al-azırda Qırım Cumhuriyetindeki İç işler nazirligi mesüliyetli olğan halq askerleriniñ regional cedveline tahminen 40 qazaq cemiyeti kirmekte. Qazaqlar politsiya hadimlerine cinayetlerniñ ögüni almağa ciddiy şekilde yardım ete, cemaat nizamını qoruy, ğayıp olğanlarnı qıdıra, em de uquqiy bilgi bere ve cemaat yerlerindeki qaidelerni añlata. Qazaq cemiyetleriniñ azaları çoqusı allarda tahqiqat tedbirlerinde iştirak etip şaatlıq ete», – dep aytıla haberde.
Daa evel aq qorçalayıcılar, qırımlı qazaqlar balalar arasında Rusiye ordusında askerlik propagandasında iştirak ete, dep bildirgen edi. Bu areketler halqara gumanitar uquqınıñ normalarını bozmaqta.
Yazda Aqyarnıñ Rusiye akimiyeti şeer soqaqlarında qazaq patrulleriniñ sayısını arttırmağa avale etti.
