Martnıñ 20-nde Qazahistannıñ işke başlağan yañı prezidenti Kasım-Jomart Tokayev Qazahistan paytahtına memleket prezidenti vazifesinden ayırılğan Nursultan Nazarbayevniñ Nursultan adını bermege teklif etti.
«Ulu zamandaşımız Qazahistan Cumhuriyetiniñ birinci prezidenti Nursultan Abişeviç Nazarbayevniñ adını ebediyleştirmek kerek olğanını tüşünem. Paytahtımız prezidentniñ adını taşıp, Nursultan dep adlandırılmalı», – dedi Tokayev, dep bildire «Nastoyaşçeye vremâ».
Tokayev 2020 senesi aprel ayına qadar saylav müddeti bitkenine qadar prezident vazifelerini eda etecek, soñra saylavlar olacaq. Saylavlarda Qazahistan prezidenti vazifesine bir qaç insan namzet kösterecek. Olarnıñ arasında – Nazarbayevniñ qızı Dariga, onıñ ömür arqadaşı ve oğlu.
Qazahistan prezidenti Nursultan Nazarbayev martnıñ 19-nda istifağa çıqqanını bildirdi. O, vazifesinden ketkenini milletke muracaat etip ilân etti. O, ömür boyu Qazahistan Havfsızlıq şurasınıñ reisi ve «Nur-Otan» ükümran firqasınıñ reisi olacaq.
Nursultan Nazarbayev 1990 senesi aprel ayından berli Qazahistannıñ prezidenti edi. 2015 senesi aprel ayında o, nevbetten tış saylavlarda beşinci kere prezident olaraq saylanğan edi. O, saylayıcılar reyleriniñ 97,75%-nı qazandı.
