Bir qaç kün evelsi kütleviy narazılıqlar sebebinden qalabalıqlar ve silâlı yağmalar başlağan Qazahistannıñ eñ büyük şeeri Almatıda vaziyet kergin olıp qala. Kütleviy haber vastaları bildirgen şaatlarnıñ aytqanına köre, merkezde atışlar devam ete.
Şeerde Cumhuriyetniñ meydanına ketken yollar qapatıldı, bu yerler soñki künleri çatışmalarnıñ merkezi oldı. Azatlıq Radiosınıñ Qazah hızmetiniñ mühbirleri meydan rayonında eñ az üç insannıñ cesedini ve qurşun izlerini kördi.
Mühbirlerniñ haber etkenine köre, şeer kenarında Aport alış-veriş merkezindeki Magnum supermarketini çaypamağa devam eteler. Alış-veriş evi yanında soğuncılıqnı toqtatmağa tırışqan göñülliler buluna. Qollarında tayaqlar bar ve olar supermarketten azıq mallarını hırsızlağanlarnı alğanları başqasına ait, dep tenbiley. Amma olarnı kimse diñlemey.
Mühbirlerniñ haberlerine köre, yaqıt stantsiyalarında ve bankomatlar ögünde balaban nevbetler tura. Bazı sakinler naqıt paraları bitti ve vaziyet daa bir qaç kün devam etse, insanlar aç qalacaq, dep ayttı. Tükânlarda ötmek yetmey. Şeerde cemaat naqliyatı çalışmay. Ava limanı vatandaşlar içün qapatıldı. Berilgen malümatqa köre, onı şimdi Qazahistan ve Rusiye arbiyleri kontrol ete.
Qazahistan İç işler nazirligi bildirgenine köre, memlekette mahsus tedbirler vaqtında, aytılğanına köre, silâlanğan 26 insan atıp öldürildi. Tahminen 4 biñ kişi yaqalandı. Akimiyet 18 uquq qoruyıcı elâk oldı, dep bildirdi.
Qazahistan prezidenti Kasım-Jomart Tokayevniñ yanvarniñ 7-nde milletke yapqan muracaatında Almatığa «20 biñ isyancı ücüm etti», dep bildirdi. Onıñ aytqanına köre, bu insanlarnı çetelde azırladılar, ve o, «terroristlerge qarşı ihtarsız ateş açmağa emir berdi», dep qoştı. Bundan ğayrı, Tokayev memleketniñ eñ büyük şeerinde olğan haos ve soğuncılıqtan «lafta serbest kütleviy haber vastalarını ve qızıştıruv yapqan çetel erbaplarını» mesül tuttı.
Yanvarniñ 2-nde memleketniñ ğarbindeki Janaozen şeerinde şingen gaz fiyatlarınıñ eki qat artqanına qarşı narazılıq aktsiyaları başlandı. Diger meskün yerlerniñ sakinleri buqa qoltuttı. Başta insanlar fiyatlar artqanına açuvlandı, amma yavaş-yavaş siyasiy talaplarını, hususan ükümet ve esas şahıslarnıñ istifası aqqında ayttı.
Yanvarniñ 5-nde Almatıda qalabalıqlar başlandı, kimligi belli olmağan insanlar şeer akimatına (ateşke berildi) ve ava limanına ücüm etti. Biznes obyektleri, bank bölüklerini çaypalandı, memuriy binalarğa ücüm etildi.
Qazahistan prezidenti şeerde «terroristler» areket ete, ve «tış tecavuz» sebebinden Ortaq telükesizlik añlaşması teşkilâtınıñ aza memleketlerinden arbiy yardım istedi, dep bildirdi. Memleketke OTAT beş memleketiniñ arbiyleri yollanıldı, ekseriyeti Rusiye arbiyi ola.
Olarnıñ narazılıq aktsiyalarını bastıruvda ya da nizam quruv tedbirlerinde iştirak etkenine dair haber yoq. Lafta «terror ile küreş tedbirlerini» Qazahistan arbiyleri keçire, olar nariye silâsını da qullana.
