Qazahistanda Bek Air ava şirketiniñ uçaq qazası neticesinde 12 kişi elâk oldı. Bu malümatnı memleketniñ sağlıq ve iç işler nazirlikleri bildirdi. Daa evel 15 insannıñ elâk olğanı bildirildi, dep haber ete Azatlıq Radiosı.
Uçaqta beş ekipaj azası ve 93 yolcu bar edi, olarnıñ arasında dört çetel vatandaşı: eki Ukraina vatandaşı, bir Qırğızistan vatandaşı, bir Qıtay vatandaşı, qalğanları – Qazahistan vatandaşları, dep bildirdi Qazahistan Tış işler nazirligi.
Eñ az 66 insan yaralandı ve hastahanege alındı, 48-i – hastahanege yatqızıldı, 12 insan ağır alda buluna.
Qazahistan kütleviy haber vastalarınıñ malümatına köre, 1990 senesi doğma qadın ve 1991 senesi doğma erkek Ukraina vatandaşlarınıñ omurğası sındı. Ukraina Tış işler nazirligi bu malümatnı daa izaatlamadı.
Qaza uçaq köterilgende oldı. Nur-Sultanğa ketken Fokker-100 uçağı Almatı ava limanından çıqqanda yükseklikni coyıp, beton qorasını yıqtı ve eki qatlı binağa (qaza vaqtında evde kimse yoq edi – QA) uruldı. Uçaq Guldala köyü yanında mesken evler rayonında tüşti. Uçaq üç parçağa bölündi.
Qazahistan baş naziriniñ muavini Roman Sklâr uçaq qazasınıñ sebebi ya uçucılarnıñ hatası, ya da tehnik hata ola bile, dep bildirdi.
Qazahistan İç işler nazirligi, qaza yerinde biñge yaqın insan ve 70 dane tehnika, 33 «acele yardım» taqımı çalışa, dep bildirdi.
