Mayısnıñ 9-nda sabadan berli Qazahistanda internet blok etile, amma akimiyetniñ izaatları daa yoq, dep bildire Azatlıq Radiosınıñ qazah bürosı.
Azattyq.org, holanews.kz, vlast.kz saytları blok etildi.
Almatanıñ merkezinde bugün akimiyet qoltutqan «Ölümsiz polk» Rusiye aktsiyası keçirile, onıñ iştirakçileri Ekinci cian cenki veteranlarınıñ süretleri ile evelden belgilengen yoldan kete.
Memlekette yasaqlanğan «Qazahistannıñ demokratik saylavı» areketi (2009 senesinden berli çetelde yaşağan ve vatanında bir sıra cinayet işlegeninde qabaatlanıp ömür boyu apis cezasına üküm etilgen sabıq bankir ve Qazahistan akimiyetiniñ tenqitçisi Muhtar Ablâzov tarafından qurulğan) de aktsiya keçirecegini ilân etti. Areket Almata, Nur-Sultan ve bir qaç diger şeerde narazılıq aktsiyalarını keçirmege planlaştıra.
Azatlıq Radiosınıñ qazah bürosınıñ mühbirleri Nur-Sultandan canlı yayın köstere.
Qazahistanda insanlarnı tutıp başladılar. Almatada vlast.kz portalınıñ mühbiri Daniyar Moldabekov tutuldı. Onı politsiya maşinasına mindirip, bölükke alıp ketirgenler. Jurnalist tutulğan bölükke şeer politsiyası departamentiniñ matbuat hızmetiniñ reberi Saltanat Azirbek kelgende Moldabekov azat etildi.
Tutulğanını almatalı aq qorçalayıcı Yerlan Kaliyev bildirdi. Bazı vatandaş faalleri içtimaiy ağlarda yazğanına köre, evleriniñ kirişleri yanında politsiya maşinaları «nevbetçilik yapa».
Mayısnıñ 1-nde Nur-Sultan, Almata, Karaganda, Semey ve Aktobede narazılıq aktsiyalarınıñ 80 iştirakçisi tutuldı. Narazılıq bildirgenler iyünniñ 9-nda Qazahistanda keçirilecek nevbetten tış prezident saylavlarını boykot etmege talap etken ediler.
Diger şiarlar arasında: «Nur-Sultan – menim paytahtım degil», «Tokayev – prezidentim degil», «Dariga – senat spikerim degil».
2019 senesi martnıñ 9-nda 79 yaşında Nursultan Nazarbayev prezident vazifesinden istifağa çıqtı, amma memleketniñ Telükesizlik şurasınıñ reisi olıp qaldı. Bu vazife oña Qazahistan inkişafınıñ esas yönelişlerini kontrol etip, esas qararlarnı qabul etmege imkân berecek. «Kommersantnıñ» malümatına köre, Nazarbayev martnıñ soñunda Avrasiya iqtisadiyat birliginiñ fahriy reisi olmaq kerek.
Qazahistanda nevbetten tış prezident saylavları iyünniñ 9-na belgilendi. Ekspertler Senat spikeri vazifesinde bulunğan Nazarbayevniñ büyük qızı Dariga namzet ola bile, dep tahmin etken edi. Amma aprel ayında ükümran firqanıñ namzeti senatnıñ sabıq spikeri Kasım-Jomart Tokayev oldı. O, martnıñ 20-nden berli prezident vazifelerini eda ete.
