Almatı, Almatı ve Jambıl vilâyetinden ğayrı Qazahistannıñ 14 regionında yanvarniñ 13-nde terror ile küreş tedbirleriniñ yekünlengeni aqqında ilân etildi. Almatı ava limanına ise birinci yolcu uçağı qondı. Bu aqta memleketniñ Milliy telükesizlik komitetiniñ matbuat hızmeti haber ete.
«Qazahistannıñ 14 regionında vaziyet stabilleşti. Cumhuriyetniñ terror ile küreş operativ ştabı terror ile küreş tedbirleri yekünlendi ve Nur-Sultan, Şımkent şeerleri, Akmolin, Aktübin, Atıraus, Şarqiy-Qazahistan, Ğarbiy-Qazahistan, Qarağanda, Qızılorda, Kostana, Mangistau, Pavlodar, Şimaliy-Qazahistan ve Turkestan vilâyetinde kritik «qızıl» terror telüke seviyesi lâğu etildi, dep bildirdi», – dep qayd etile haberde.
Qayd etilgenine köre, «Almatı şeerinde, Almatı ve Jambıl vilâyetinde qalabalıqlar vaqtında başqa cinaiy faaliyet ile alâqası olğan terrorist ve şahıslarnı tapuv ve tutuv tedbirleri yerine ketirile».
Yanvarniñ 13-nde açılğan Almatı halqara ava limanına birinci yolcu uçağı qondı, dep haber ete Qazahistannıñ vatandaş aviatsiyasınıñ komiteti.
Uçaq memleketniñ paytahtı Nur-Sultan şeerinden keldi.
Müessiseniñ malümatına köre, yanvarniñ 13-ne saat 8:00-dan 21:00-ğa qadar Nur-Sultandan Almatığa tahminen sekiz uçuş planlaştırıla.
Yanvarniñ 6-na keçer gecesi qalabalıqlar vaqtında Almatı ava limanına ücüm yapıldı. Qave, tükân, uçaq biletleriniñ satış noqtaları yoq etildi.
Qazahistanda yanvarniñ ekisinde şingen gaz fiyatları artqanından kütleviy narazılıqlar başlandı. Bu narazılıqlar bütün memleketke tarqaldı. Qazahistan akimiyeti Almatığa çetelde azırlıq körgen «20 biñ terrorist» (soñra İç işler nazirligi şeerde narazılıq aktsiyalarında iştirak etkenlerniñ umumiy sayısı aqqında aytıla, dep qayd etti) ücüm etti, dep bildirdi. Şu sebepten Tokayev OTAT blokundan yardım istedi. Rusiye ve ittifaq arbiyleri «strategik obyektlerni» kontrol altına aldı, akimiyet narazılıqlarnı bastıruvda olarnıñ iştirakini inkâr ete.
Qazahistan akimiyetiniñ malümatına köre, şimdi vaziyet normalleşe. Ortaq telükesizlik añlaşma teşkilâtınıñ aza memleketleriniñ orduları yanvarniñ 13-nde çıqıp başlamalı.
