Yanvarniñ 11-nde saba Qazahistanda tutulğanlarnıñ sayısı 9 900 insan oldı, dep haber ete memleketniñ İç işler nazirliginiñ matbuat hızmeti instagram-kanalında.
Bir kün evelsi İç işler nazirligi tutulğan 7939 kişi aqqında aytqan edi.
Şeer komendaturası bergen malümatqa köre, Almatıda 1237 insan tutuldı. Olarnı terrorizm, yağma ve diger cinayetlerde qabaatlaylar. Akimiyet 30-dan çoq nariye silâsı ve 1428 silâ parçası alındı, dep bildire. Komendnatura Medeus, Auzov ve Alatau rayonları ve şeer ava limanına yaqın olğan «Ojet» meskün yeri «aydut gruppirovkalarından temizlendi», dep bildirdi.
Qazahistan prezidentiniñ matbuat hızmeti narazılıqlardan soñ memlekette 412 mahkemeden evel tahqiqat, hususan terrorizm ve öldürüvnen bağlı tahqiqatlar başlatıldı.
Bundan ğayrı, Almatıda mitingler vaqtında memuriy uquq bozuvları rayonlarara mahkemesiniñ qadısı Murat Abrayev elâk oldı. Ölüm sebebi aytılmay.
Jambıl vilâyetiniñ polis yolbaşçısı, general Janat Suleymenov özüni öldürdi, Qazahistan Milliy telükesizlik komitetiniñ polkovniki Azamat İbrayev de ölü tapıldı. Cesedi Nur-Sultandaki eviniñ pencereleri ögünde tapıldı.
Soñra belli olğanına köre, Almatınıñ Turksib rayonınıñ polis idaresi yolbaşçısınıñ muavini Tanat Nazanovnıñ iş yerinde infarktı oldı.
Qazahistanda yanvarniñ ekisinde şingen gaz fiyatları artqanından kütleviy narazılıqlar başlandı. Bu narazılıqlar bütün memleketke tarqaldı. Qazahistan akimiyeti Almatığa çetelde azırlıq körgen «20 biñ terrorist» (soñra İç işler nazirligi şeerde narazılıq aktsiyalarında iştirak etkenlerniñ umumiy sayısı aqqında aytıla, dep qayd etti) ücüm etti, dep bildirdi. Şu sebepten Tokayev OTAT blokundan yardım istedi. Rusiye ve ittifaq arbiyleri «strategik obyektlerni» kontrol altına aldı, akimiyet narazılıqlarnı bastıruvda olarnıñ iştirakini inkâr ete.
Qazahistan akimiyetiniñ malümatına köre, şimdi vaziyet normalleşe. Mustaqil jurnalist ve yerli sakinlerniñ haberlerine köre, Almatıda ateş sesleri daa eşitile, amma umumen vaziyet akimiyetniñ kontroli altında qala. Narazılıq aktsiyaları yoq.