Qazahistanda Ortaq telükesizlik añlaşması teşkilâtınıñ esas missiyası yekünlendi, ordularnıñ çıqması yanvarniñ 13-ne planlaştırıldı. Bu aqta memleketniñ prezidenti Kasım-Jomart Tokayev bildirdi, dep haber ete Zakon.kz.
«OTAT barıştırıcı quvetleriniñ esas missiyası muvafaqiyetnen yekünlendi. Eki künden soñ OTAT birleşken barıştırıcıları ardı-sıra çıqıp başlaycaq. Arbiyler eñ çoq 10 künde çıqar», – dep ayttı Qazahistan yolbaşçısı.
Tokayevniñ aytqanına köre, Qazahistannıñ bütün regionlarında vaziyet «stabil» qala. Çıqışlarında memleketke Almatıda akimiyetini tikleycek olğan «terroristler ve çetel isyancıları» ücüm etti, dep kene qayd etti. Şeerniñ yañıdan quruluvını «şahsiy vazifesi» dep adlandırdı.
Devlet yolbaşçısı uquq qoruyıcı sistemasınıñ islâatını keçirmege, İç işler nazirligi ve Milliy gvardiya mahsus bölükleriniñ erkânlarını, arbiy tehnika, qoruv ve ücüm vastalarınıñ sayısını arttırmağa vade etti. O, quvetçilerge ücüm etüv içün mesüliyet daa sert olacaq, dep qayd etti.
Tokayev iqtisadiyat islâatları aqqında aytıp, şunı qayd etti: «Qazahistan inkişaf bankı saylanğanlar içün şahsiy bank oldı». O, ükümet azaları, deputat ve akimlerniñ (yerli memuriyetlerniñ yolbaşçıları) aylıqlarını arttıruvda beş yıllıq moratoriy qoydı. Qazahistan yolbaşçısı saylav bülletenlerinde «er keske qarşı» grafasını qaytarmağa söz berdi. O, sentâbr ayında halqqa muracaat etip, memlekette siyasiy islâatlarnıñ yañı paketini taqdim etecek, dep bildirdi.
Yanvarniñ 10-nda OTAT online sammiti vaqtında Tokayev memleketniñ soñki adise-vaqialarını «çetel terroristleri» de iştirak etken «devlet devrimi ıntıluvı» dep adlandırdı. Rusiye prezidenti Vladimir Putin ise Qazahistanda «maydan tehnologiyaları» ve «çetelde terroristlerniñ lagerinde azırlıq körgen isyancılar» qullanıldı, dep bildirdi.
Qazahistanda yanvarniñ ekisinde şingen gaz fiyatları artqanından kütleviy narazılıqlar başlandı. Bu narazılıqlar bütün memleketke tarqaldı. Qazahistan akimiyeti Almatığa çetelde azırlıq körgen «20 biñ terrorist» (soñra İç işler nazirligi şeerde narazılıq aktsiyalarında iştirak etkenlerniñ umumiy sayısı aqqında aytıla, dep qayd etti) ücüm etti, dep bildirdi. Şu sebepten Tokayev OTAT blokundan yardım istedi. OTAT erkânına Ermenistan, Beyazrusiye, Qazahistan, Qırğızistan, Rusiye ve Tacikistan kire.
Qazahistan prezidenti memlekette OTAT 2,3 biñ barıştırıcısı ve 250 tehnika bar, dep haber etken edi. OTAT baş kâtibi Stanislav Zas çetel orduları olğan yerlerni aydınlattı: Nur-Sultan, Almatı, Almatı vilâyeti.
Berilgen malümatqa köre, Rusiye ve ittifaq arbiyleri «strategik obyektlerni» kontrol altına aldı, akimiyet narazılıqlarnı bastıruvda olarnıñ iştirakini inkâr ete. Yanvarniñ yedisinde Qırğızistan parlamenti ögünde Qazahistanğa ordu kirsetüvge qarşı miting ötkerildi. Azerbaycan Milliy demokratik quvet şurası OTAT ordularınıñ Qazahistanğa kirmesini takbih etip, çetel orduları memleketni tez terk etmeli, dep tüşüngenini bildirdi. Şura, Tokayevniñ narazılıq bildirgenlerni «terrorist» dep adlandırğanını ve ateş açmağa emir etkenini takbih etti.
