Link açıqlığı

Saatnıñ esas haberi

Qazahistan prezidenti: «Qırımda olğanlarnı ilhaq dep adlandırmaymız»


Qazahistan prezidenti Kasım-Jomart Tokayev ve Rusiye prezidenti Vladimir Putin
Qazahistan prezidenti Kasım-Jomart Tokayev ve Rusiye prezidenti Vladimir Putin

Qazahistan prezidenti Kasım-Jomart Tokayev Rusiye Ukrainağa ait yarımadanı öz toprağına «qoşqanı» aqqında ilân etken 2014 senesi Qırımda olıp keçken adise-vaqialarnı ilhaq dep adlandırmağa istemey.

Bu aqta o, Deutsche Welle intervyüsında ayttı.

«Qırımda olıp keçkenlerni ilhaq dep adlandırmaymız. Olğanı oldı. İlhaq – Qırımğa nisbeten qullanılğan pek ağır bir söz», – dep qayd etti Qazahistan prezidenti.

2014 senesi Rusiye Qırımnı işğal etken soñ Qazahistan Tış işler nazirligi yapqan beyanatında «Qazahistan, BM Nizamnamesine köre halqara uquqnıñ esas printsiplerine sadıq qalğanını tekrar qayd etip», Qazahistanda «Rusiye Federatsiyasınıñ bu vaziyette» alğan qararını añlaylar, dep qayd etken edi.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG