Rusiye prezidenti Ukrayınağa qarşı cenkke seferberlikni ilân etken soñ 1000-den çoq qırımlı Qazahistanğa keldi. Bu aqta Qırımtatar Milliy Meclisiniñ reisi Refat Çubarov Facebookta bildirdi.
«Olarnıñ sayısı toqtamayıp arta, çünki yolda olğan daa çoq insan bar. Qazahistanğa çıqqan çoqusı Ukrayına vatandaşı zor vaziyette qaldı: uzun yoldan soñ paraları bitti, qalacaq yerleri yoq, Ukrayınağa nasıl baracaqlarını añlamaylar», – dep bildirdi Çubarov.
Onıñ aytqanına köre, Qırımtatar Milliy Meclisiniñ gumanitar meseleler koordinatsion merkezi «eñ acele meselelerni» gece-kündüz çezmege tırışa.
Çubarov, Rusiye seferberliginden qaçqan Ukrayına pasportı olğan Qırım sakinlerine yardım etüv meselelerinen bağlı qararlarnı acele qabul etecek Ukrayına müessiselerara işçi gruppasını «tez qurmağa» çağırdı.
Sentâbrniñ 21-nde Rusiyede qısmiy seferberlik ilân etilgen soñ Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Aq qorçalayıcılarnıñ malümatına köre, 5 biñden çoq qırımlı celpname aldı. Aqyarnıñ Rusiye akimiyeti yedekte olğan tahminen 2 biñ kişi Rusiyege ant etti, dep bildirdi.
Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırımda arbiy komissarlıqlar qırımtatarlar toplu yaşağan yerlerde kütleviy şekilde celpnameler bere, dep bildirdi. «Krım SOS» aq qorçalayıcı teşkilâtı qırımtatarlarnıñ seferberligi olarnıñ genotsidine yol aça bile, dep bildirdi.
Ukrayına prezidentiniñ Qırım Muhtar Cumhuriyetindeki temsilciligi Rusiye seferberligine oğrağan qırımlılar içün areket algoritmini derc etti. Rusiye ordusına çağırılmaqtan qurtulmağa istegenler içün «canlı destek» açıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
