Ukrayina prezidenti Volodımır Zelenskıy Rusiye ordusınıñ Vinnıtsâğa raketa darbesine cevap berdi.
"Vinnıtsâ. Şeer merkezine raketa ücümleri. Yaralanğanlar ve ölgenler bar, olarnıñ arasında ufaq bala. Er kün Rusiye barışıqsever adamlarnı yoq ete, ukrayina balalarını öldüre, vatandaş obyektlerine raketalar ata. Anda arbiy iç bir şey yoq. Açıq terror eylemi olmasa, bu nedir? Zalımlar. Qatil memleket, - dep yazdı prezident.
Bugün Rusiye Vinnıtsâğa raketa derbesini endirdi. Ukrayina prezidenti ofisiniñ reis muavini Kırıl Tımoşenko 20 adam ölgeni aqqında haber etti, olarnıñ arasında üç bala.
Ukrayina Milliy polisiniñ yolbaşçısı İgor Klımenko haber etkeni kibi, "ilk malümatqa köre Rusiyeniñ üç raketası ofis odası olğan binağa tüşken, darbelerden sebep Zabitler evi ve yaqınlarda yerleşken mesken evler zarar körgen".
Moskva bir çoq delillerge baqmadan Ukrayinada vatandaşlarğa ateş açmağanını bildire.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
