Qarasuvbazardaki «Hizb ut-Tahrir davasınıñ» üç mabüsi Enver Ömerov, Riza Ömerov ve Ayder Capparov akimiyetni küçnen zapt etmege tırışqanında qabaatlandı. Bu aqta advokat Lilâ Gemeci Qırım.Aqiqatqa tarif etti.
«Akimiyetni küçnen zapt etmege azırlanğanında qoşma qabaatlav (Rusiye Ceza kodeksiniñ 30 ve 278 maddesi aqqında aytıla – QA) – Qırımda ilk sefer olmay. FSB, aynı davalarnıñ mabüsi olğan qırımtatarlarda bu stsenariyni qullandı. Yaltadaki ve Bağçasaraydaki ekinci «Hizb ut-Tahrir davalarınıñ» mabüsleri de akimiyetni küçnen zapt etmege tırışqanında qabaatlanğan edi», – dedi advokat.
Gemeciniñ aytqanına köre, Qırımdaki FSB tahqiqatı bu dava mabüsleriniñ cezasını sertleştirmek içün qoşma qabaatlav qullana.
«Resmiy olmağan subetlerde tahqiqatçılar (FSB – QA) tedbir almaq içün qoşma qabaatlav (akimiyetni küçnen zapt etmege azırlanğanında – QA) bergenini bildirgen edi. Qoşma madde (ceza kodeksiniñ – QA) – umumen daa ciddiy bir qabaatlav ve dava mabüsleri içün ceza. Ceza müddeti de arta», – dep ayttı Gemeci.
Fevralniñ 13-nde Rusiye kontrolindeki Qırım Yuqarı mahkemesi Qarasuvbazardaki «Hizb ut-Tahrir davasınıñ» mabüslerini apiste qaldırdı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
