Cenübiy okrugınıñ arbiy mahkemesi Riza ve Enver Ömerovlar ve Ayder Cepparovnıñ apiste qaluv müddetini kelecek sene yanvarniñ 15-ne qadar uzattı, dep bildire «Qırım birdemligi» cemaat birleşmesi.
Apis cezasını uzatuv muracaatını bermezden evel prokuror Yevgeniy Kolpikov mabüslerniñ şahsiyetlerini tasvirlegen vesiqalarnı ayttı. Bütün tasvirler müsbet edi, vesiqalar ise dava mabüsleriniñ daimiy iş, yaşağan yer ve çağına yetmegen balaları bar olğanını isbatlay. Bundan soñ o, SİZOda tutuv müddetini üç ayğa, 2021 senesi yanvar ayına qadar uzatmağa talap etti, çünki mahkemeden saqlana ve delillerge zarar ketire bile.
İmaye tarafı azatlıqtan marum etüv ile alâqası olmağan bir tedbir saylamağa rica etti. Advokatlar, müvekkilleri mahkemeden saqlanmağa istemey, aksine qabaatsız olğanlarını isbatlamağa istey, dep ayttı. Bundan ğayrı, Enver Ömerov hasta, ameliyat yapılmalı, SİZOda bulunması ise vaziyetini daa beter ete. Mahkeme prokurornıñ muracaatını tamamen qanaatlendirdi. Reis qadı Roman Saprunovnıñ qayd etkenine köre, esnas yanvar ayına qadar sozulmaycaq.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov veEskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
