Qarasuvbazarnıñ ülkeşınaslıq müzeyinde qırımtatar ressamı Ramiz Netovkinniñ hatıra aqşamı olıp keçti. Qırım.Aqiqat mühbiriniñ bildirgenine köre, teşkilâtçılar ressamnıñ ayatı ve icadı aqqında qısqa film kösterip, fotoresimlerniñ küçük sergisini numayış etti.
Tedbir çerçivesinde Netovkinniñ hatırasına bağışlanğan icadiy işler yarışınıñ ğalipleri taqdirlendi.
«Ramiz Qırımnı pek seve edi, öz resimlerinde ketken Qırımnı tasvir etmege tırışqan edi. İcadındaki çoq şey bugün olmağan manzaralarğa bağışlandı. Ramiz ketken Qırımnıñ manzaralarını saqlap qalmaq içün isse qoşqanı kibi bizler de Ramizniñ hatırasını saqlap qalmaq içün birleştik. Yarış iştirakçileriniñ icadiy işleri derc etilecektir. Ğayelerimiz çoq ve ileride çoq iş bar», – dep qayd etti tedbir teşkilâtçılarından biri Eskender İlyasov.
Tedbirde Ramiz Netovkinniñ ev-müzeyini ğayrıdan tiklev meselesine de diqqat ayırıldı. İlyasovnıñ aytqanına köre, böyle obyektniñ açılışı Qarasuvbazarnıñ turistik keleceginiñ inkişafına yardım ete bile.
2018 senesi oktâbr ayında qırımlı faaller ressam Ramiz Netovkinniñ hatırasını saqlav teşebbüs gruppasınıñ qurulğanını ilân etken edi.
Ramiz Netovkin 1960 senesi Taşkent vilâyetiniñ Almazar qasabasında dünyağa keldi. 1975 senesinden berli Qarasuvbazarda yaşadı. 1980 senesi Samokiş Aqmescit bediiy oquv yurtunı bitirdi. «Qarasuvbazarnıñ civarları» albomı içün Bekir Çoban-Zade mukâfatınıñ «Qarasuvbazarnıñ keçmişi, bugüni ve kelecegini aks ettirgen eñ eyi eser» kategoriyasınıñ laureatı oldı. 1983 senesinden başlap vilâyet, cumhuriyet ve çetel sergileriniñ faal iştirakçisi oldı.
Aqmescit, Bağçasaray, Kezlev, Aluşta, Moskva (Rusiye), Tartu (Estoniya), Varşava ve Lüblin (Poloniya), New York (ABD), Kastamonuda (Türkiye) şahsiy sergileri keçirildi. Ressam 2011 senesi iyülniñ 16-nda vefat etti.
