Qırımnıñ Qarasuvbazar rayonındaki Sarı-Su köyünde iyünniñ 19-nda eki ev tintildi, dep haber ete «Qırım birdemligi» cemaat teşebbüsi Facebook saifesinde.
Qayd etilgeni kibi, tahqiqat tedbirleri vaqtında tutulğanlar yoq.
«Qırım birdemligi» tintüvler Akseit Cancankovnıñ evinde ve anasınıñ evinde keçirile, dep bildirgen edi.
Qırımtatar Milliy Meclisiniñ reisi, Ukraina halq deputatı Refat Çubarovnıñ fikirince, işğal etilgen Qırımda «qırımtatarlarğa qarşı total tarama devam ete». O, iyünniñ 19-nda Qırımda Qarasuvbazar rayonınıñ Sarı-Su qasabasında eki evde keçirilgen tintüvlerni izaatladı. O, «Rusiye quvetçileri tarafından qırımtatarlarnıñ evlerinde tintüv keçirilgen, Rusiye mahkemeleri tarafından qırımlılarğa uzun apis cezaları berilgen» işğal etilgen Qırımdaki vaziyetten sebep Ukraina akimiyetini BM Havfsızlıq şurasınıñ acele toplaşuvınıñ keçirilmesini teklif etmesine çağırdı.
Qırımdaki müessiseler bu malümatnı daa izaatlamadı. Qırım.Aqiqat tafsilâtlı malümat almağa tırışa.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
