Link açıqlığı

Saatnıñ esas haberi

Qarasuvbazar rayonınıñ sakini evinde keçirilgen tintüv aqqında tarif etti


Qırımdaki tintüv, 2020 senesi iyünniñ 2-si
Qırımdaki tintüv, 2020 senesi iyünniñ 2-si

Qırımnıñ Qarasuvbazar rayonındaki Qışlav (Kurskoye) köyünde yaşağan qırımtatarı Şeyde Asanova iyünniñ 2-nde evinde keçirilgen tintüv vaqtında quvetçiler oğluna qarşı açılğan «cinaiy davanen» bağlı vesiqa ya da eşyalarnı qıdırdı, dep bildirdi.

Asanovanıñ «Qırım birdemligi» cemaat birleşmesine bildirgenine köre, tahqiqat içün müim olğan vesiqa ya da eşya tapılmadı.

«Tintüv keçirmege keldik, oğluñız Noman Çelebicihan batalyonına kire. «Eviñizni tintecekmiz» dedi. «Buyurıñız» dedim. «Timsal, silâ ve ilâhre barmı?». «Bir şey yoq» dep cevap berdim. Bir şey tapmadılar», – dep bildirdi Asanova.

Şeyde Asanovanıñ aytqanına köre, oğlu Rustem Asanov 2016 senesinden berli esas Ukrainada yaşay.

«Protokol Rustemge qarşı tizildi. Men şaatlıq etmekten vazgeçtim. Ne yapayım, oğlum… Babasınen qavğa etip anda ketti, evlendi. Ara-sıra özü telefon ete, biz telefon etmeymiz», – dep qoştı o.

Berilgen malümatqa köre, tintüv Rusiye kontrolindeki Kiyev rayon mahkemesiniñ 2020 senesi martnıñ 3-nde alğan qararı esasında keçirildi.

Hatırlatamız, iyünniñ 2-nde Qarasuvbazar rayonınıñ Qışlav (Kurskoye) köyünde qırımtatarlarnıñ evinde tintüv keçirildi.

Daa evel Qırımda qurucısı Lenur İslâmov sayılğan «Noman Çelebicihan göñülli batalyonınıñ» azaları olğanında qabaatlı tanılğan üç qırımtatarına qarşı qabaatlayıcı qarar qabul etildi. Bu birleşmeniñ azaları olğanından şübheli sayılğan daa eki qırımlınıñ ğıyabiy ükmü çıqarıldı.

Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.

Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.

«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.

XS
SM
MD
LG