Daa evel siyasiy mabüs Rusiye Federatsiyasınıñ Çelâbinsk vilâyetiniñ Verhneuralsk apishanesinde tutuldı. O, ükümge köre, üç yıl apishanede qalmalı edi. Ayderniñ ömür arqadaşı Margaritanıñ aytqanına köre, Yuqarı Uralsk apishanesiniñ yolbaşçısı daa 2022 senesi iyün ayında siyasiy mabüsni qabul etmek istemedi, çünki o endi üç yıl SİZO-da oturğan ve onı birden koloniyağa avuştıracaq ediler. Amma bu endi, eki yıldan soñ oldı.
Bu sene fevral ayında Ayder ve Margaritanıñ oğlu Abdulla Cepparov rak hastalığından vefat etti. O, 13 yaşında edi. Babası oğlunı defn etip, vedalaşıp olamadı.
Ayder Cepparov 2019 senesi iyün ayında Qarasuvbazar "Hizb ut-Tahrir" davası boyunca yaqalandı ve apiske alındı. 2020 senesi yanvarniñ 12-nde Rostov-na-Donu şeeriniñ Cenübiy okrugınıñ arbiy mahkemesi Cepparovnı 17 yılğa azatlıqtan marum etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
