Bugünge planlaştırılğan Rostov-na-Donu Cenübiy bölgeniñ arbiy mahkemesinde Qarasuvbazar "Hizb ut-Tahrir davası"nıñ iştirakçileri Ayder Capparov, Riza ve Enver Ömerovalar ile bağlı mahkeme oturışı olmadı.
“Qırım birdemligi” cemaat birleşmesine advokat Aleksandr Stasükniñ biligenine köre, onıñ müvekkili Capparov alı yaramay olğanı içün kameasından çıqmqtan red etken.
Advokatnıñ malümatına köre, SİZO şaraitinde Capparovnıñ parmağında “irinli stafilakokk qızarıntı” peyda olğan.
"Üç aftadan berli çekişe. Oña antibakterial ve qızarıntığa qarşı preparatlarnen ine uralar. O, SİZO-dan çıqarıp tibbiyet bolyugine yatqızılmasını, hirurgik operatsiya yapılmasını istep müdiriyetke ariza yazdı, çünki parmağa irinlemege devam ete", - dedi Stasük.
Evel Cepparov qan basımı ve qolundaki qızarıntı onı raatsızlağanı aqqında mahkemede aytqan edi.
Nevbetteki mazkeme oturışı aralıq ayınıñ 17-nde olacaq. Mahkeme, mahkemelengenlerniñ alı mahkeme oturışında iştirak etmege kelişkenini, kelişmegenini ögrenmek içün SİZO-ğa malümat talabı yolladı.
Aprelniñ 24-ünde Rusiyeniñ Rostov-na-Donu Cenübiy okrugınıñ arbiy mahkemesi Qarasuvbazardaki «Hizb ut-Tahrir davasınıñ» üç mabüsini daa yarım yılğa apiste qaldırdı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
