Rusiye tarafından işğal etilgen Qırımda Qarasuvbazar rayonınıñ Kriniçnoye köyü yanındaki qum ocağı çevrege zararlı sanayı dev büyükligine yetti, o, etraftaki tabiat müitine büyük zarar ketire ve yerli sakinlerniñ yaşayış keyfiyetini tüşüre. Bu aqta Qırımlı ekologlardan biri Qırım.Aqiqatqa bildirdi.
Onıñ malümatına köre, qum ocağı er yıl kenişley ve o istisal etken mahsulatnıñ miqdarı büyük ölçüde arttı.
"Qum ocağından yük maşnaları toqtamadan keteler, künde yüzlernen. Kriçnoye—Qarasuvbazar yolu olardan sebep havflı-telükeli vaziyetke ketirildi. Qum ocağındn çıqqan toz bulutları onlarca kilometrge tarqala. Köydeki ev saipleri gece-kündüz gürültü, toz ve evlerinde küçlü titremelerden yüz bergen patlavlarğa şikâyet arizalarını berip red cevaplarını almaqtan yoruldılar. Yazıq ki, 2014 senesinden soñ Qırımda vaziyetke tesir ete bilecek faal ekologik cemaat teşkilâtları qalmadı", — dep bildirdi ekolog.
Ekolognıñ qayd etkenine köre, böyle kârlı müessise Qırımdaki Rusiye akimiyetiniñ birinci şahısınıñ merağını doğurğan.
İşğal etilgen Qırımda Rusiye akimiyeti ve ticariy qurulışlar tarafından Ukrayina topraqlarınıñ işlenüvi Ukrayina ve halqara qanunları ceetinden qanunsızdır. Rusiye işğaliniñ yıllarında Qırım yarımadasında şahta ve quyularnıñ sayısı bayağı arttı, bu ise region ekologiyasına büyük zarar ketire.