Ekinci Bağçasaray "Hizb ut-Tahrir davası" boyunca qarar beklenilgen edi, dey advokat Aleksey Ladin.
"Mahkeme oturışı üylelik teneffüsinen saba saat 10-dan aqşam 21:00-ğa qadar uzandı. Em de nasıl deyim üylelik. Mabüslerge çoçqa etini teklif ettiler, onıñ içün olar aç qaldı. İmaye tarafından açlıq işkencesini toqtatmaq ve mahkemeni yarınğa qaldırmaq muracaatları red etildi. Qarar beklenilgen edi. Kimse mücize beklemedi (bir-biri artından 2 mücize bu çoqtır)", - yazdı Facebook saife3sinde advokat.
O, mabüsler ruhtan tüşmegenini ve mahkemege öz taqibatını qırımtatar halqınıñ siyasiy sebepli taqibatı sayğanını aytqanlarını qayd etti.
Rostov-na-Donu şeerindeki Cenübiy arbiy bölge mahkemesi ekinci Bağçasaray "Hizb ut-Tahrir davası" boyunca qarar çıqardı. Böylece, Merlen Asanovğa şiddetli koliniyada 19 yıl üküm etildi; Memet Belâlovğa şiddetli koliniyada 18 yıl ve 1,5 yıllıq sıñırlav üküm etildi; Timur İbragimovğa - şiddetli koliniyada 17 yıl ve 1,5 yıllıq sıñırlav üküm etildi; Server Zekiryayevge şiddetli koliniyada 13 yıl üküm etildi; Server Mustafayevge şiddetli koliniyada 14 yıl ve 1 yıllıq sıñırlav üküm etildi; Seyran Saliyevge - şiddetli koliniyada 16 yıl ve 1 yıllıq sıñırlav üküm etildi; Edem Smailovğa şiddetli koliniyada 13 yıl ve 1 yıllıq sıñırlav üküm etildi; Ernes ametov qabaatsız tanıldı ve mahkeme binasında azat etildi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
