"Ukrayinanıñ Qara deñizdeki ücüm imkânlarınıñ quvetleştirilmesi, büyük ihtimal ile, Rusiyeniñ işğal etilgen Qırım üzerindeki nezaretini telükege oğratır", — dep qayd ettiler talilciler, Ukrayina Mudafaa nazirliginiñ Baş istihbarat idaresiniñ Qara deñizde Rusiyeniñ Mi-8 vertolötlarına uçucısız uçaqlarnıñ ücüm etkeni aqqında yañartılğan malümatını izaatlap, tafsilâtlı malümat bermeyler.
Yanvarniñ 2-nde Ukrayina Mudafaa nazirliginiñ Baş istihbarat idaresi Qara deñizde Qırım yanındaki operatsiya malümatını aydınlattı. GUR malümatına köre, dekabrniñ 31-nde Magura V5 deñiz dronları, evel bildirilgeni kibi, bir degil de, eki Mi-8 Rusiye ordusınıñ vertolötını yoq etti.
GUR malümatına köre, daa bir Rusiye vertolötı ateşten zarar kördi ve tüşip ene bildi.
Ukrayina Arbiy-deñiz quvetleriniñ spikeri Dmıtro Pletentçuk, Rusiyeden kelgen malümatqa köre, vertolötlarda sekiz ekipaj azası bar edi, dep şübhe bildirdi, amma, yüksek seviyede azırlanğan vertolöt ekipajlarınıñ er angi ğaybeti duşman içün ciddiy ola, dep qayd etti.
Rusiye tarafı resmiy şekilde vertolötlarnıñ ğayıp oluvını izaatlamadı. Rusiye Mudafaa nazirligi arbiy obyektlerge zarar ketirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
