Ukrayina istihbaratınıñ mahsus operatsiyası neticesinde Rusiyeniñ "Tsezar Kunikov" büyük desant gemisi battı, dep bildire "UP" neşiri Ukrayina Mudafaa nazirliginiñ Baş istihbarat idaresindeki menbağa atıp etip.
"Krımskiy veter" telegram-kanalınıñ malümatına köre, Mishor kurortı rayonında Rusiyeniñ BDG yoq etildi. Qurtaruv işleri içün daa bir gemi yollanıldı, dep aytıla haberde.
Aynı zamanda Rusiye Mudafaa nazirligi Qara deñiz üzerinde altı uçucısız uçaqnı yaqalağanını bildirdi.
Rusiye Mudafaa nazirligine yaqın olğan "Rıbar" telekanalınıñ malümatına köre, rusiyeli BDG kerçekten zarar kördi, amma onıñ zarar derecesi belli degil. "Eki mayor" telekanalı, bütün ekipaj sağ olğanını bildire.
2022 senesi martnıñ 24-nde Ukrayina Silâlı quvetleriniñ Baş ştabı, işğal etilgen Berdânskta "Tsesar Kunikov" Rusiye gemisi battı, dep bildirdi.
2023 senesi dekabr 26-da ukrayin quvetleriniñ Qırımdaki Kefe limanına ücüminden soñ, ukrayin tarafınıñ malümatına köre, Rusiyeniñ "Novoçerkassk" desant gemisi yoq etildi.
Rusiye Mudafaa nazirligi Ukrayina Silâlı quvetleriniñ Kefede Novoçerkask desant gemisine ücüm etkenini tasdıqladı.
Astra telekanalınıñ malümatına köre, 33 deñizci ğayıp oldı. Olarnıñ soy-sopları DNK örneklerini teslim ettiler, üç ay içinde teşkerüv neticelerini bermege vade eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
