Qırımda Fiolent burnu civarında Rusiye devriye gemisi Büyük Britaniya Arbiy-deñiz flotunıñ HMS Defender raketa eskadron mina taşıyıcısına tenbi ateşi açtı, Su-24M bombardıman uçağı ise tenbi bombalar attı.
Bunı Rusiye Mudafaa nazirligine atfı etip Qırım ve Rusiye kütleviy haber vastaları bildire.
«İyünniñ 23-nde saat 11:52-de Büyük Britaniya Arbiy-deñiz flotunıñ HMS Defender raketa eskadron mina taşıyıcısı Qara deñizniñ şimal-ğarp qısmında areket etip, Rusiye Federatsiyasınıñ devlet sıñırını keçti ve Fiolent burnu civarında 3 km-ge territorial deñizge kirdi», – TASS agentligi Rusiye Mudafaa nazirliginiñ bildirmesinden alıntı ketire.
Krıminform neşriniñ malümatına köre, Rusi bombardıman uçağı ateş açqan soñ, saat 12:23-te eskadron mina taşıyıcısı bulunuv yerini terk etken.
İyünniñ 21-nde, bazarertesi künü, Odesada Büyük Britaniya Arbiy-deñiz flotunıñ HMS Defender raketa eskadron mina taşıyıcısında Ukraina Mudafaa naziriniñ muavini Alekesandr Mironük ve Büyük Britaniya Mudafaa satın almalar meseleleri naziri Ceremi Kvin Birleşken Qırıllıq ve Ukraina ADQ arasında deñiz işbirligi leyhası aqqında memorandum imzaladılar.
İyünniñ 18-nde Odesa limanına eki NATO gemisi kirdi. Büyük Britaniya ADQ-niñ «Defender» eskadron mina taşıyıcısı (HMS Defender, D36) ve Felemenk ADQ-niñ «Evertsen» Ava mudafaası fregatı (HNLMS Evertsen, ili Zr.Ms. Evertsen, F805).
İyünniñ 23-nde Rusiyeniñ ABD-deki elçiligi Birleşken Devletlerni ve olarıñ ittifaqdaşlarını Qara deñizde arbiy talimlerde iştirak etmemege çağırdı.
