Qara deñizde eki Rusiye tankeriniñ qazası mazutnıñ büyük kölemde tökülmesine sebep oldı, o, endi Cenübiy Qırımnıñ yalılarına barıp yetti. Bu ekologik felâketniñ başlanğıçıdır, çünki kirlenüv sıcaq avada artacaq, dep bildirdi Ukrayina ekologik ligasınıñ yolbaşçısı Tetâna Tımoçko «Suspilne» yayınında.
«Suvuq suvda mazut tübünece kete, amma avalar qızğanınen irimege başlaycaq, bu ise ekinci kirlenüvge ketirecek. O, yalı boyunıñ büyük qısmını qaplap, deñiz terenliklerindeki canlı organizmlerni yoq etecek», – dep añlata Tımoçko.
Ekolognıñ qayd etkenine köre, mazut endi deñiz quşları içün telükeli ola, olarnıñ çoqusı tüklerini temizlep olamağanından ölgen.
Ekologlar halqara cemiyetni, hususan Qara deñiz regionı memleketlerini qazanıñ ekologik neticelerini eñ az derecege ketirmek içün Rusiyege qarşı basqını arttırmağa çağıra.
Greenpeace Ukrayina müdiri Natalâ Gozak Qırım.Aqiqatqa izaat berip, böyle kirlenüvniñ neticelerini yoq etmek içün tek bir müessiseniñ degil, halqara işbirliginiñ ğayreti kerek olğanını da bildirdi.
«Lâkin eminim, Rusiye irişmege yol bermez, malümat mümküni qadar sıñırlı olacaq. Ve men Rusiye Federatsiyası aqibetlerni yoq etmek içün bir çare qıdıracağından pek şübhelenem. Olğanı kibi qalacaqtır», – dedi o.
Cermay tökülgeninden 10 biñge yaqın quş kirlengen yerde qala, çoqusı ölecek. Böyle fikirni Rusiye ornitologiya cemiyetiniñ müdiri Vladimir Romanov bildirdi.
Quşlar mazutnıñ içki müçelerine kirgeninden öleler, yaqın künlerde quşlarnıñ kütleviy ölümi başlana bile. Anapada «quşlarnı qurtaruv noqtası» açıldı, lâkin, Romanovnıñ aytqanına köre, quşlarnıñ bir çoq çeşiti temizlengen soñ bile öle.
Qırım.Aqiqat bildirgenine köre, mazut taşığan eki «Volgoneft» tankeri bazar künü, dekabrniñ 15-nde, resmiy malümatqa köre, furtuna sebebinedn Keriç boğazında battı.
Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
