Rusiyeniñ Qara deñiz flotu Qırım ve Aqyarda «terrorizm ile küreş tedbirlerini ve diversiyalarğa qarşı tedbirlerni quvetleştirmege» niyetlene. Bu qarar Rusiye Qara deñiz arbiy şurasınıñ toplaşuvı vaqtında qabul etildi, dep haber ete TASS Rusiye devlet haber agentligi Rusiye Qara deñiz flotunıñ informatsion teminlev bölügine esaslanıp.
«Flotnıñ arbiy şurası regiondaki diversion quvetlerge qarşı tedbirlerni, icra akimiyetniñ yerli organlarını haberdar etüv quvetleştirüv qararlarını qabul etti, diger flot quvetleriniñ faaliyet meselelerini muzakere etti», – dep haber etildi.
Bu toplaşuvda, Rusiye Qara deñiz flotunıñ komandanı Viktor Sokolovdan ğayrı, Rusiye kontrolindeki Qırım yolbaşçısı Sergey Aksenov ve Aqyar yolbaşçısı Mihail Razvojayev iştirak etti.
«Diversion quvetlerge qarşı» tedbirler nasıl quvetleştirilecek aytılmay.
Daa evel berilgen malümatqa köre, Qırımda noyabrniñ 7-ne qadar yüksek («sarı») terror telükesiniñ seviyesi uzatıldı.
Putinniñ fermanına köre, işğal eetilgen Qırım ve Aqyarda «orta seviyeli tedbir» kirsetildi. Bir sıra sıñırlavlar beklenile. Qırımnıñ Rusiye yolbaşçısı Sergey Aksenov Qırımda komendant saatı ve Qırımğa kiriş sıñırlavları şimdilik planlaştırılmay, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
