Qara deñizde yanğan tankerlerden ğayıp olğan on deñizci, mahkeme qararına köre, elâk olğanlar kibi sayılacaq, dep bildire Deñiz qurtaruv hızmetiniñ başı muavini Viktor Çernovğa esaslanıp “Interfaks” agentligi.
“On adam ala daa tapılmadı ve ğayıp olğan sayıla”, - dep yaza Çernov sözlerinden matbuat.
Onıñ aytqanına köre, Rusiye qanunlarına binaen, ğayıp olğanlar yarım yıldan soñ elâk olğanlar kibi tanılacaq.
Rusiye deñiz-özen flotunıñ matbuat kâtibi Aleksey Kravçenko, tanker ekipajiniñ bütün cesetleri aynılandı dep bildire.
Yanvarniñ 21-nde Qırım yalısında Tanzaniya bayrağı altında MAESTRO ve CANDY tankerlerinde patlav ve yanğın oldı.
«Maestro» tankeri Rusiyeniñ Temrük şeerine kete edi, anda 14 Türkiye ve İndistan vatandaşı bar edi. «Candy» tankerinde 17 insan bar edi – olap da Türkiye ve İndistan vatandaşları. Ukrainalı jurnalist Andriy Klımenkonıñ aytqanına köre, tankerler «ABD Suriye sanktsiya cedvelinde» olğan Milenyum Denizcilik Gemi türk şirketine ait.
Haber etilgenine köre, 10 insan elâk oldı, daa 12-si qurtarıldı. Yaralanğan deñizciler №1 Keriç şeer hastahanesine alıp ketirildi.
Yanğın ve patlavğa oğrağan tankerler Suriyege qanunsız şekilde şingen gaz taşığan edi, dep bildirdi Ukrainanıñ vaqtınca işğal etilgen topraqlar meseleleri nazirligi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.
