NATO gemileri Qara deñizde «Deñiz qalqanı – 2019» talimlerini (Sea Shield 2019) bitirdi. Bu aqta ekinci daimiy arbiy-deñiz gruppasınıñ (SNMG2) komandanı Boudewijn Boots Twitterde yazdı.
«SNMG2 bugün Qara deñizde Sea Shield 2019 talimlerini yüksek temsilcilik ile bitirdi. Prezident Yohanniske (Romaniya prezidenti Klausu Yohannis – QA) ve general Çukege (Romaniya Silâlı quvetleri Baş ştabınıñ yolbaşçısı Nikolaye Çuke – QA) gemilerimizni ziyaret etkenleri içün teşekkür bildiremiz», – dep yazdı NATO komandanı.
Qara deñizde aprelniñ 5-nden 13-ne qadar NATOnıñ «Deñiz qalqanı – 2019» talimleri keçirildi. ABD, Bulğaristan, Kanada, Yunanistan, Felemenk, Türkiye ve Romaniya gemileri ve aviatsiyası Gürcistan ve Ukraina Silâlı quvetlerinen işbirligi tutıp iştirak etti.
NATO Arbiy-deñiz quvetleriniñ birleşken komandanlığından talimlerde SNMG-2 (Standing NATO Maritime Group) daimiy birleşmesi iştirak etti. O, 2019 senesi martnıñ 28-nden Qara deñizde areket ete, onıñ erkânına Bulğaristan, Kanada, Felemenk, Romaniya ve Türkiye gemileri kirmekte.
NATO talimlerine cevap olaraq Rusiye Mudafaa nazirligi Qara deñizge istihbarat ve ücüm gemilerini, Rusiye Qara deñiz flotunıñ sahil raketa komplekslerini çıqardı.
