Türkiye qurtarıcıları Qara deñizde batqan gemide elâk olğan daa eki ukrainalınıñ cesedini çıqardı dep bildirdi Twitterde Türkiyede Ukraina elçisi Andrey Sıbiga.
“Qurtarıcılar qıyın ava şaraitinde daa 2 cesedni taptı. Yaqın vaqıtta tanıma tedbiri keçirilecek. O yerde, Samsunda konsul da çalışa”, - denile beyanatta.
Daa evel Türkiye qurtarıcıları Qara deñizde batqan gemide elâk olğan ukrainalınıñ cesedini çıqarğanları haber etildi.
Yanvarniñ 7-nde saba Qara deñizde Türkiyeniñ şimalindeki Samsun şeeriniñ sailinde ava vaziyeti sebebinden Panama bayrağı altında VOLGO BALT 214 yük gemisi battı. Gemi taqımınıñ 13 azasından 11-i Ukraina vatandaşı ve ekisi Azerbaycan vatandaşı edi.
Türkiye kütleviy haber vastalarınıñ malümatına köre, taqımnıñ altı azası elâk oldı. Ukrainanıñ Türkiye elçisi Andriy Sıbiğanıñ bildirgenine köre, yedi ukrainalı qurtarıldı, dördü elâk oldı. Ukraina elçisi Qara deñizde batqan gemide qurtarılğan ukrainalı deñizcilerniñ cedvelini derc etti.
Azerbaycan Tış işler nazirligi, bir vatandaşı elâk oldı, ekincisini ise qıdıralar, dep bildirdi.
«Maydan zakordonnıh sprav» cemaat teşkilâtı nezaret şurasınıñ reisi, Black Sea News baş muarriri Andriy Klımenkonıñ bildirgenine köre, yanvarniñ 7-nde Türkiye sailinde batqan gemi 2014-2015 seneleri işğal etilgen Qırımnıñ limanlarına kirgen edi.
Ukrainanıñ vaqtınca işğal etilgen topraqları ve memleket içinde köçken insanlarnıñ meseleleri nazirligi bildirdi ki, yanvarniñ 7-nde Qara deñizde batqan geminiñ Azov limanından (Rusiye) Samsun limanına (Türkiye) kömür taşıması mümkün edi.
