Qara denizde tanker yanğınında elâk olğan dört deñizciniñ cesedi ilhaq etilgen Qırımdan uçaqnen Moskovağa yollanıldı. Yaqın vaqıtta olarnı İstanbulğa alıp ketecekler. Bu aqta “Krıminform”ğa Kreml nezaretindeki Keriç memuriyeti başı Dilâver Melgaziyev bildirdi.
“Türkiye vatandaşı olğan dört adamnıñ cesedi bugün İstanbulğan içacaq. Olar endi Aqmescitten Moskovağa yollanıldı. Moskovada İstanbulğa yollanılmaq içün öz uçaqnı bekleyler”, - ikâye etti Melgaziyev.
Onıñ aytqanına köre, elâk olğanlarnıñ qalğan altısı - İndistan vatandaşları. Şimdilik olarnıñ cesetleri Keriç morgunda, olarnı yollamaq içün vesiqalar azırlanıla.
“İndistannıñ altı vatandaşına barğanda, olar boyunca daa resmiy meseleler çezile. Moskavada yerleşken İndistan elçiliginen muzakere etile. Vesiqalar resmiyleştirile. Olar da yaqın künde yollanılacaq”, - dep qayd etti o.
Yanvarniñ 21-nde Qırım yalısında Tanzaniya bayrağı altında MAESTRO ve KANDİ tankerlerinde patlav ve yanğın oldı.
«Maestro» tankeri Rusiyeniñ Temrük şeerine kete edi, anda 14 Türkiye ve İndistan vatandaşı bar edi. «Kandi» tankerinde 17 insan bar edi – olap da Türkiye ve İndistan vatandaşları. Ukrainalı jurnalist Andriy Klımenkonıñ aytqanına köre, tankerler «ABD Suriye sanktsiya cedvelinde» olğan Milenyum Denizcilik Gemi türk şirketine ait.
Rusiye Tahqiqat komiteti Qırım yalısında yanğın neticesinde tankerlerde insanlarnıñ elâk olğanı sebebinden «diqqatsızlıqtan sebep eki ve daa ziyade şahısnı öldürüv» maddesi boyunca cinaiy iş açtı.
Haber etilgenine köre, 10 insan elâk oldı, daa 12-si qurtarıldı. Yaralanğan deñizciler №1 Keriç şeer hastahanesine alıp ketirildi.
Yanğın ve patlavğa oğrağan tankerler Suriyege qanunsız şekilde şingen gaz taşığan edi, dep bildirdi Ukrainanıñ vaqtınca işğal etilgen topraqlar meseleleri nazirligi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.
