Kyivdeki Sofiya meydanında oktâbrniñ 15-nde Rusiyede ve işğal etilgen Qırımda tutulğan ukrainalı siyasiy mabüslerge qoltutuv aktsiyası keçirildi. Aktsiya iştirakçileri meydanda Rusiye apishanelerinde siyasiy sebeplerden tutulğan Ukraina vatandaşlarınıñ sayısını timsal etken 87 qapqan qoydı, dep bildire Qırım.Aqiqat mühbiri.
Aktsiyada siyasiy mabüslerniñ tuvğanları ve eski siyasiy mabüsler İlmi Umerov, Vladimir Baluh, İsmail Ramazanov, İgor Movenko iştirak ettiler.
Teşkilâtçılar Rusiye apishanelerinde tutulğan ukrainalılar aqqında risalelerni tarqattı.
«Bu aktsiya eki ay devamında Ukrainanıñ büyük şeerlerinde keçirilgen edi. Bugün Kyivde bu aktsiyanıñ matbuat turınıñ mantıqlı soñu oldı. Mence, bu müim aktsiyalar edi, qapqanlar şeklinde yahşı bir installâtsiya oldı, qabaatsız insanlarnıñ Rusiye qapqanlarına tüşip, adaletsiz bir şekilde tutulğanını yahşı köstere», – dedi Mümine Saliyeva, Bağçasaraydaki ekinci «Hizb ut-Tahrir davasınıñ» mabüsi Seyran Saliyevniñ ömür arqadaşı.
Onıñ aytqanına köre, aktsiyanıñ maqsadı – işğal etilgen Qırımda taqip etilgen qırımtatarlar ve ukrainler aqqında büyük sayıda insanğa tarif etmektir.
«Er bir aktsiyadan soñ monitoring yapıldı, men müsbet dinamikanâ kördim, bir çoq regional jurnalist siyasiy mabüsler meselesine diqqat ayırdı. Aktsiya vaqtında bir çoq insan Qırımda ne olıp keçkenlerini soradı. Çoq insan siyasiy mabüslerniñ sayısına şaştı, ne içün o qadar qırımtatarı olğanını soradı», – dep qoştı o.
Aktsiya «Kreml esirleri» matbuat turı çerçivesinde avgustnıñ ortasından oktâbrniñ ortasına qadar Ukrainanıñ çeşit şeerlerinde keçirildi: Odesa (avgustnıñ 13-ü) ve Hersonda (avgustnıñ 15-i) aktsiyalardan başladı. Bundan soñ faaller Harkiv (sentâbrniñ 3-ü) ziyaret etti, ileride – Mariupol (sentâbrniñ 6-sı), Zaporijjâ (sentâbrniñ 10-u), Dnipro (sentâbrniñ 12-si), Lviv (sentâbrniñ 16-sı), Çernivtsi (sentâbrniñ 19-ı), Vinnıtsa (oktâbrniñ 1-i) ve Çerniğiv (oktâbrniñ 10-u).
Ukraina Yuqarı Radasınıñ İnsan aqları vekâletlisi Lüdmila Denisovanıñ ilk malümatına köre, Rusiye öz topraqlarında ve işğal etilgen Qırımda daa 110 Ukraina vatandaşını tuta.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheliVladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
