2025 senesiniñ ilk üç ayı içinde işğal etilgen Qırımda 38 qanunsız tutuv qayd etildi, 12-si qırımtatarlarğa qarşı, dep qayd etti Qırımtatar resurs merkezi.
Böylece fevralniñ 5-nde «Hizb ut-Tahrir» davası boyunca beş kişi tutuldı: Emir Kurtnezirov, Abibulla Smetlâyev, Rustem Mustafayev, Mirzaali Tacibayev, Bahtiyar Ablayev. «Devlet hainligi» maddesine istinaden on üç insan tutuldı, 14 kişi de Rusiye ordusını «itibardan tüşürüv» sebebinden tutuldı.
«2024 senesiniñ aynı müddeti vaqtında 41 tutuv qayd etildi, olardan 18-i – qırımtatarlarğa qarşı, 2023 senesi – 61 ve 49», – dep aytıla haberde.
2025 senesiniñ ilk üç ayı devamında 36 apiske aluv qayd etildi, 21-i qırımtatarlarğa qarşı, 44 sorğu, sorav ve «subet» oldı, 16-sı qırımtatarlarğa qarşı keçirildi.
Daa evel Qırımtatar resurs merkezi bildirgenine köre, Qırım ilhaqı vaqtında aq qorçalayıcılar 399 siyasiy mabüsni ve cinaiy davalar boyunca taqip etilgenlerni qayd etti, olardan 241-i qırımtatarı ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
