Bazar künü, avgustnıñ 9-nda, Beyazrusiyede prezident saylavları olıp keçti. Akimiyetniñ bildirgenine köre, ilk malümatqa köre, devletniñ şimdiki yolbaşçısı Aleksandr Lukaşenko reylerniñ 80%-ını qazanıp ğalebe qazana. Biñlernen insan bu neticelerni sahte sayıp, narazılıq bildirmek içün soqaqlarğa çıqtı. Politsiya narazılıq bildirgenlerni sert bir şekilde dağıttı, dep bildire «Nastoyaşçeye Vremâ».
Azatlıq Radiosınıñ Beyazrusiye hızmeti bildirgenine köre, avgustnıñ 10-na keçer gecesi quvetçiler Beyazrusiyeniñ paytahtı Minskte olğan narazılıq aktsiyaları vaqtında ışıq ses granatalarını ve köz yaşlatıcı gaz qullandı. Uquq qoruyıcılarğa qarşı ateş açıldı.
Ayrı militsiya bölügi insanlarnı Ğalebeniñ 50 yılı parkına taba çetleştirip başladı. Narazılıq aktsiyaları vaqtında Associated Press jurnalisti Mstislav Çernovnı köteklegenler. Onı acele yardım alıp ketti. Azatlıq Radiosınıñ malümatına köre, onlarnen insan tutuldı.
«BELTA» devlet agentligi aydınlatqan devlet Exit pollınıñ malümatına köre, Lukaşenko Beyazrusiye prezidenti saylavlarında ğalebe qazandı. Berilgen malümatqa köre, Lukaşenko reylerniñ 79,7%-ını aldı. Ekinci yerni muhalifet namzeti Svetlana Tihanovskaya (6,8%), üçünci yerni Anna Kanopatskaya (2,3%) qazandı.
