Qırımtatar Milliy Meclis reisi Refat Çubarov Poloniyanıñ Rusiyedeki sabıq elçisiniñ (avgust 2014 – iyül 2016 s.), şimdi ise «Poloniya areketi 2050» muhalefet fırqası lideriniñ mesleatçısı Katajina Pelçinskaya-Nalençniñ «belki de» Rusiyeni «Qırımnen sevmege kerek olacaq» bildirmesine qabul etilmez ve utanmaz dedi.
«Realist olayıq, Donbasnen Rusiyeni begenmemiz, amma, belki de, bir kün Qırım ile başqa çare olmaz... Qırımnıñ işğalini mudafaa etmege istemeyim, çünki şübesiz bu tecavuz edi, amma Rusiye Qırımdan öz ihtiyarınen vazgeçecekmi? Bellesem yoq», – dedi o Poloniya halkhara munasebetler institutına intervyü vaqtında.
Çubarov qayd etti ki, onıñ fikrince, Pelçinskaya-Nalenç «Qırımnıñ devam etken Rusiye işğali şaraitinde tamır halq qırımtatarlarnıñ başına kelgen facialar aqqında aselet susqan».
«Ya da, Allah saqlasın, Qırım ile birlikte Rusiyege sevgi şaraitinde daa nasıl facialar yüz berecek. sözlerinde Qırım yarımadasında Rusiye işğalcileri tarafından insan aqlarınıñ qaba şekilde bozuluvını körmemezlikke uruv qabul etilmez ve utanmaz. Diplomatiyanı çetke alıp aytsaq, bu hanım, Rusiye işghalcileri taarfından tamır qırımtatar halkınıñ yoq etilmesini em özü körmemezlikke urmaq istey, em de digerlerni de bunı yapmağa çağıra», – dep yazdı Çubarov Facebookta.
Refat Çubarov, Poloniya cemiyeti Poloniya siyasetçisiniñ «Ukraina, Qırım ve qırımtatarlarğa qarşı aytılğan» qabul etilmez sözlerine «lâyıq cevap bereceigne» inanğanını bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
