Rusiyeniñ Rostov-na-Donu Cenübiy okrugınıñ arbiy mahkemesi oturışuvında prokuror qırımlı Oleg Prıhodko içün 11 yıl sert rejimli koloniya cezası berilmesini istedi. Üç yılnı apishanede keçirsin ve 200 biñ ruble para cezasını ödesin, dep qayd etildi. Bu aqta advokat Nazim Şeyhmambetov Qırım.Aqiqatqa bildirdi.
«Devlet qabaatlavı munaqaşalarda çıqışta bulundı, qabaatlayıcı mahkemeden Oleg Arkadyeviçni bütün maddelerge istinaden qabaatlı tanıp, 11 yıl sert rejimli koloniyada qalmasına, üçüniñ apishanede keçirmesine, 200 biñ ruble para cezasını ilâve ceza olaraq ödemesine üküm etmesini rica etti», – dedi Şeyhmambetov.
Onıñ qayd etkenine köre, dekabrniñ 23-nde imaye tarafı munaqaşalarda çıqışta bulunacaq daa bir oturışuv olacaq.
«Şu künü Oleg Arkadyeviçke soñki söz imkânı berilse, mahkeme mesleat odasına qarar çıqarmaq içün ketecek», – dep qoştı advokat.
Şeyhmambetovnıñ aytqanına köre, Prıhodkonıñ ükmü yañı yıldan evel çıqarıla bile.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
