Qırımda Rusiye quvetçileri tarafından tutulğan Elviza Aliyeva, Nasıba Saidova ve Fevziye Osmanovanıñ analarına apiste bulunğan qızlarına teslimat yapmağa izin berilmedi.
Bu aqta olar "Qırım birdemligi" cemaat birleşmesine bildirdiler.
Berilgen malümatqa köre, başta olar psihiatrik hastahanege ketkenler, anda qızlarnı keçken afta mahkeme-psihiatrik ekspertizasına alıp ketken ediler. Qadınlarnıñ aytqanına köre, o yerde olarğa qızlarına teslimat yapmağa izin berilmedi, çünki er şey yahşı, olarnı yahşı aşta ekenler.
Bundan soñ analar, apiske alınğan qızlarnıñ tutuv şaraitlerini muzakere etmek içün Aqmescitniñ 1-nci SİZO-sınıñ müdirinen körüşmege tırıştılar.
"Qızımnıñ sıcaq suvu olmağanı aqqında laf etmek istedik, yavlıqlarını yırta ekenler. Nasiba Saidovanı hasta adamnen beraber kamerağa oturtqanlar. Ev balası, sağlam, ya hastalansa?" — dedi Elvizanıñ anası Elvira Aliyeva.
SİZO-ğa kelgen qadınlarğa müessise yolbaşçısı toplaşuvğa ketkenini aytqanlar. Körüşüv başqa künge deñiştirilgen.
Rusiye memurları ve uquq qoruyıcılarınıñ bu vaziyetke dair resmiy izaatları şimdilik yoq.
Orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Tutulğanlar arasında Esma Nimetulayeva, beş balanıñ anası ve siyasiy mabüsniñ apayı; Nasiba Saidova, bala bağçasında çalışqan student; Elviza Aliyeva ve Fevziye Osmanova.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dört kişini eki ayğa SİZO-ğa yolladı.
