Ukraina TİN Rusiye prezidenti Vladimir Putinniñ işğal etilgen Qırımğa kene kelmesine qatiy narazılıq bildirdi. Bunıñ aqqında Qırım.Aqiqatqa nazirlikte haber ettiler.
"Rusiye memurlarınıñ muvaqqat işğal etilgen Qırım yarımadasına Ukraina tarafı ile kelişilmegen diger seferleri kibi bu ziyaretni de Rusiye tarafından Ukraina suverenitetiniñ, halqara uquq qaideleriniñ, BMT BA qararlarınıñ, Rusiyeniñ mecburiyetleriniñ qaba bozuvı kibi qıymetlendiremiz", - dep yazıla bildirmede.
Ukraina TİN, Rusiye tarafı "halqara uquq mecburiyetlerini" yerine ketirilmeli, dep qayd etti.
"Rusiyeniñ işğalci devlet kibi muvaqqat işğal etilgen Qırım sakinleri aqqında kerçekten tüşüngenini köstemege imkânı bar: insan aqlarınıñ bozuvlarını toqtatmaq, şu cümleden siyaisiy basqılar, qırsızlavlar ve öldürüvler, qanunsız sürette mahküm etilgen ukrainlerni azat etmek ve diqqatını Rusiye-Ukraina arasındaki çatışmanıñ çezilmesine celp etmek", - dep yazıla bildirmede.
Noyabrniñ 4-nde Rusiye prezidenti Vladimir Putin işgal etilgen Aqyarğa kelip çıqtı. O, Milliy birlik kününe bağışlanğan tedbirlerde iştirak etti ve "Qırım ve Aqyar ebediyen Rusiye ile" olğanını bildirdi.
