Qırımnıñ Canköy rayonındaki Stefanovka köyünde 49 yaşındaki yerli sakin"opertiv-qıdıruv tedbirlerini keçirmek içün" evine kelgen Rusiye quvetçilerine ateş açtı, dep bildire Qırım ve Aqyar boyunca Rusiye Tahqiqat komitetiniñ idaresi.
Qayd etilgenine köre, saban ayınıñ 16-nda Rusiye kontrolindeki Canköy mahkemesiniñ qararına binaen rayon cinaiy-qıdıruv bölügi yolbaşçısınıñ muavini, operativ vekâletli ve eki Rusiye polisiniñ hadimi aqaynıñ evine kelgen, amma o olarnı içeri kirsetmegen ve olarğa ateş açqan. Atışuvdan soñ onı tutıp alğanlar.
Ev saibi, qanun vekillerini evge kirsetmek istemegeni içün olarğa bir qaç kere silâdan ateş açtı ve telükesizlik hadimlerini bir çoq kere yaraladı. Bundan soñ cinayetçi öz maşnasını yaqtı ve evni de yaqmağa tırıştı. Ücüm etken adamnı politsiya hadimleri ve Rusiye telükesizlik ve mudafaa nazirliginiñ Rosgvardiya bölüginiñ quvetçileri zararsızlaştırğan.
Erkekniñ adı ve soyadı bildirilmey, onıñ açıq izaatları da yoq. Al-azırda o yaqalanğan, oña Rusiye Federatsiyası Ceza kodeksiniñ 317-nci maddesine istinaden (polis hadimlerine ücüm) şübheli sayılğanı bildirile.
Rusiye quvetçileri onıñ evine ne maqsatnen kelgenleri ve aqay ne sebepten ateş açqanı belli degil.
"Krımskiy veter" kanalınıñ yazğanına köre, yaqalanğan kişi Ukrayinağa qarşı cenkte iştirak ete, Rusiye polisi ise aile içi añlaşmamazlıq sebebinden kelgen.
Bu malümatnıñ daa tasdıqlanması kerek.