Qıtayda Covid-19 koronavirus yuqunçına oğrağanlarnıñ sayısı 75 biñ 465 insan oldı, dep bildire Qıtay Halq Cumhuriyetiniñ Milliy sağlıq komissiyası. Fevralniñ 21-ne qadar Qıtayda 889 yañı koronavirus hastası qayd etildi, bir künde 118 kişi öldi, dep bildire «Nastoyaşçeye Vremâ».
Yañı virustan ölgenlerniñ sayısı 2236 kişi oldı. Daa 2109 hasta tedaviylenip hastahaneden çıqtı. Qırğınlıq başlağanından berli Qıtay Halq Cumhuriyetinde 18 biñ 264 insan tedaviylendi.
Qıtay akimiyeti, yanvarniñ soñundan berli hasta olğanlarnıñ eñ alçaq raqamını qayd etken köstergiçlerniñ esabını tüzetti, dep bildirdi. Ekimlerniñ aytqanına köre, fevralniñ 20-nda tek Uhanda sebebi koronavirus olğan hastalıq 600 kişide şübhe doğurğan edi. Amma 279 insannıñ bu hastalığı tasdıqlanmadı.
Qalğan dünyada koronavirus biñden çoq insanda, hususan Yaponiyada qayd etildi. Qıtay tışında 11 kişi yuqunçtan elâk oldı.
Yañı çeşit koronavirus yuqunçı Qıtayda 2019 senesi dekabr ayında tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
