Qıtayda yanvar 31-iniñ sabasınace yañı koronavirusnıñ neticesi olğan pnevmoniyadan 213 adam öldi. Bunı China Global Television Network televizion kanalı bildire. Olarnıñ malümatına köre 171 adam yahşı oldı, bildire Azatlıq Radiosı.
Yerli matbuat Qıtayda 9 biñden ziyade adamnıñ yoqulanması aqqında haber ete. Daa tahminen 32 biñ adamda hastalıq bar olğanında şübelene.
Yanvarniñ 30-ında Bütündünya sağlıq teşkilâtı Qıtay koronavirusını global bir fevqulâde vaziyet dep ilân etti.
Bütündünya sağlıq teşkilâtınıñ müdiri Tedros Adhanom Ghebreyesusnıñ aytqanına köre, Qıtaynıñ tışında 18 memlekette 98 koronavirus hastalığı adisesi qayd etildi. Qıtay tışında ölüm adiseleri aqqında haber yoq.
Yaqında qayd etilgen virus büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
Daa evel Moğolistan ve Qırğızistan Qıtay sıñırını qapattı, dep bildirdi. Özbekistan, Qazahistan ve Turkmenistan sıñırdaki kontrolni quvetleştirdi. Rusiye işğal etken Qırım ve Aqyarda koronavirus telükesi tarqalğanı içün tevsiyeler çıqarıldı.
