Link açıqlığı

Qıtay Halq Cumhuriyetiniñ yatırımcıları Rusiye ile Qırımda limannı qurma muzakerelerini yañıdan başladılar, dep ayttı Qırım «baş naziriniñ birinci muavini» Rustam Temirgaliyev, haber ete QHA.

Onıñ aytqanına köre, Qıtay tarafı ile körüşüvler avgust ayına belgilendi – leyha acele degildir.

«Rubl kirsetilgen ve yarımada suvnen temin etilgen soñ, leyhanı başlaycaqmız», – dep añlattı Temirgaliyev.

Neşirniñ yazğanına köre, 25 metrlik liman Qırımnıñ Saq rayonında Kezlevden 25 kilometr mesafede yerleşken Frunze qasabasınıñ yanında qurulacaq. Leyhanıñ 3 milliard dollarlıq birinci basamağı çerçivesinde büyük yüklerni qabul etecek liman-haba qurulacaq. Bundan ğayrı, zahire ve tökülgen yükler içün 20 million tonnalıq bir qaç terminal qurulması mümkün. Ekinci basamaq olaraq ava limanı, sinilgen tabiiy gaz ve gemilerni qurma terminalı belgilendi.

Qırımda limannı qurma leyhası 2013 senesi dekabr 5-te, Viktor Yanukoviç prezident olıp Qıtaynı ziyaret etken vaqıtta, ilân etilgen edi.

Bunıñnen bağlı añlaşma imzalanğan edi. Lâkin añlaşmanı ömürge keçirüv muzakereleri ve areketleri Maydandaki inqilâbiy vaqialar, Yanukoviçniñ memleketten qaçıp ketüvi ve Qırım işğalinden sebep toqtatılğan edi.
XS
SM
MD
LG