Qıtayda 2019-nCoV koronavirusından ölgenlerniñ sayısı 1016-ğa arttı, dep bildirdi yerli Milliy sağlıq komissiyası. Qıtay ekimleri ve Dünya sağlıq teşkilâtınıñ malümatına köre, Qıtaynıñ esas qısmında 42 638 koronavirus hastası qayd etildi, daa 316 hasta diger 24 memlekette qayd etildi, anda bir kişi öldi, dep bildire Azatlıq Radiosı.
Qırğınlıqnıñ merkezi olğan Hubey vilâyetinde 2097 yañı hasta qayd etildi, 103 insan can berdi.
Hastalar arasında eñ az eki ukrainalı bar. Olar fevralniñ 4-nden berli koronavirus qayd etilgeni içün Yaponiya yalısında eki aftalı karantinde bulunğan Diamond Princess tur gemisinden çıqarıldı.
Yaqında qayd etilgen virus büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
