Qıtayda yañı 2019-nCoV koronavirusı neticesinde 800-den ziyade adam öldi. Bunı Azatlıq Radiosı haber ete.
Fevralniñ 9-ında Çin Milliy Sağlıq Komissiyası, fevralniñ 8-inde merkeziy Hubei bölgesinde 89 yañı ölüm adisesi qayd etilgenini bildirdi. Umumen ise 811 adam elâk oldı.
Buna baqmadan, memuriy merkezi Wuhan olğan Hubei bölgesinde fevralniñ birisinden soñ ilk sefer yañı infektsiyalarnıñ sayısı azlaştı.
Memurlar, bir kün içinde ümumen ülkede 2566 yañı adise, añılğan bölgede ise 2147 yuqum adisesi qayd etilgenini bildirdi.
Yañı 2019-nCoV koronavirusınen hastalanğanlarnıñ umumiy sayısı - 37198 adamdır. Olarnıñ ekseriyeti Qıtayda, amma dünyanıñ daa 24 memleketinde de infektsiyalanğan adam bar.
Bugün Qıtayda "Remdesivir" antivirus ilâcınıñ klinika sınavları başlaycaq. South Morning China Post yaza ki, ilâcnıñ istisalcısı - Wuhandaki virusologiya institutınıñ - müellif aqları ile problemaları çıqa bile. 2016 yılda "Remdesivir"ni Gilead Sciences Amerika şirketi işlep çıqardı. Amma şimdilik ilâc dünyanıñ iç bir yerinde tasdıqlanmadı.
Yanvarniñ 30-ında Bütündünya sağlıq teşkilâtı Qıtay koronavirusını global bir fevqulâde vaziyet dep ilân etti.
Qıtay alimleri 2019 senesi dekabrniñ 31-nde adiy olmağan pnevmoniya aqqında ilk sefer bildirdi. Olar yañı koronavirusnı ayırıp, tolu genomını derc etti.
Ekimlerniñ bildirgenine köre, yañı koronavirus ağır pnevmoniyanıñ sebebi ola bile. Ayrı bir tedaviylevi yoq, tek alâmetleri yımşatıla bile. Ağır hastalıq immuniteti zayıf olğan insanlarda ve esli-başlılarda ola.
Dünya sağlıq teşkilâtı yañı koronavirusnı dünya seviyesinde fevqulâde vaziyet dep adlandırdı.
